• 文物选粹
  • 光影旧梦
  • 海上之声
  • 上海闲话
  • 文化遗产
  • 海上小报
  • 新旧路名
  • 海上寻踪
  • 沪剧
  • 越剧
  • 百校百歌
  • 杨乃武与小白菜——密室相会(邵滨孙、筱爱琴)
  • 碧落黄昏——志超读信(王盘声)
  • 妓女泪——自叹(杨飞飞)
  • 罗汉钱——回忆(丁是娥)
  • 杨乃武与小白菜——探监告状(邵滨孙、石筱英)

海上寻踪

        六千年的历史,从东海一隅的小渔村到闻名于世的国际大都会,您是否想了解她身后的沧桑与辉煌?

        两百余处国家级、市级文物保护单位,六百余处上海市优秀历史建筑,百余处博物馆、纪念馆,这千余景点您是否不知从何看起?

        本栏目收录了大量极具参观价值的上海市文物保护单位、古迹及上海市优秀历史建筑的相关资料,提供三维地图直接缩放定位和分类检索定位等多种搜索方式,是您了解上海丰富历史文化的好帮手。

诸暨年糕

钱汉东

       壬辰岁末,西施故里诸暨乡亲搭我送来了家乡个年糕,让我欣喜勿已。我对诸暨年糕情有独钟,辣我小辰光个记忆里,年糕占据了重要个位置。搿个年糕白亮白亮个,上面还有一条条细细个纹路,闻辣海就有股稻米清香,吃辣嘴巴里滑滑个、糯糯个,软软个,还有嚼劲,一眼也勿黏牙齿。

       年糕是江南个特色食品,具有久远个历史。家家人家过年个辰光侪会得自家做年糕。小辰光我回老家省亲,春节将至,家家侪要拂尘洗涤,除旧迎新。最让我期待个是 “舂年糕”之“盛事”,辣辣乡里,搿个是顶闹猛个辰光,“新年”个序幕就辣“舂年糕”辰光拉开了。

       台门廊檐下闲置老长辰光个石臼搬了出来,女人家拿石臼里里外外汏得清清爽爽,然后移到客堂间,几张八仙桌浪,准备做年糕个粉摆辣海,迭个“年糕粉”由糯米搭晚稻粳米粉合成,揉成一个大粉团,上蒸笼蒸,蒸熟以后从热气腾腾个蒸笼里拿出,再摆辣石臼里,再由几个男丁一道抬起一个巨型长柄木槌,上下自如个捶捣石臼里个大粉团,“呯、呯”个声音有节奏地传出,悦耳又动听,感觉人心捣鼓得痒痒个,恨勿得立马放到嘴里解解馋。石臼旁坐个老人,用蘸上水个双手,用力个翻动石臼里个年糕粉团,配合木槌上下捣击。当“年糕粉团”反复捶捣得勿再黏手了,就拿伊摆到八仙桌浪,整个台门个空气里弥漫着稻米个醇香,邪气诱人。大人们有说有笑,勿时还会弄个小粉团,叫我先尝尝。我老高兴个一面急来死扯一小团塞进嘴巴,一边豪燥拿剩下个粉团拉捏成像上海粢饭团样个大小,分别嵌入底部刻有各种图案、花纹个长条形红木年糕印模里向,乃末,用手辣“年糕粉团”浪用力揿几记,再拿印模倒扣辣台子浪,年糕从印模里“脱颖而出”。我个兄嫂们心灵手巧,伊拉还会捏大元宝及小白兔、金鱼、小狗、公鸡等小动物,并拿动物们染上红绿颜色,真个是栩栩如生。我总归小心翼翼个收藏好,拿伊拉带回上海拨拉白相个小伙伴欣赏,扎台型噢!

       埃个辰光亲眷屋里并勿富裕,屋里余粮勿多,舂个年糕也勿多,不过当阿拉要回沪个辰光,乃末搿家送10条,埃家送8条,总归让阿拉拿勿动为止。回沪后我姆妈又会拿年糕赠送上海个亲友,还要捎带一句吉言“年年高”,让亲友们一道分享过年个快乐。中国年糕文化个内涵辣辣老百姓当中得到了最好个演绎,难怪伊生生不息得以传承。我实地考察过,阿拉祖先种植稻谷历史悠久,汉代已有类似年糕个记载。

       现在个年糕侪用机器做了,勿见了当年“舂年糕”热闹情景,缺失了令人回味个情调,难免有些遗憾,好在家乡个清澈水质搭优质粳米,让诸暨年糕仍旧保留了老味道。吃了乡亲送来个年糕,回味小辰光看到个“舂年糕”场景,让我辣辣寒冷个冬天里,心头却是热乎乎个。

       摘自新民晚报20130227 B4版