• 文物选粹
  • 光影旧梦
  • 海上之声
  • 上海闲话
  • 文化遗产
  • 海上小报
  • 新旧路名
  • 海上寻踪
  • 沪剧
  • 越剧
  • 百校百歌
  • 杨乃武与小白菜——密室相会(邵滨孙、筱爱琴)
  • 碧落黄昏——志超读信(王盘声)
  • 妓女泪——自叹(杨飞飞)
  • 罗汉钱——回忆(丁是娥)
  • 杨乃武与小白菜——探监告状(邵滨孙、石筱英)

海上寻踪

        六千年的历史,从东海一隅的小渔村到闻名于世的国际大都会,您是否想了解她身后的沧桑与辉煌?

        两百余处国家级、市级文物保护单位,六百余处上海市优秀历史建筑,百余处博物馆、纪念馆,这千余景点您是否不知从何看起?

        本栏目收录了大量极具参观价值的上海市文物保护单位、古迹及上海市优秀历史建筑的相关资料,提供三维地图直接缩放定位和分类检索定位等多种搜索方式,是您了解上海丰富历史文化的好帮手。

明天是“国际母语日”

祁清籁

        大多数人并勿晓得,每年个2月21号,也就是明朝,是一个对于我伲有得特殊意义个日脚,就是“国际母语日”(International Mother Language Day),到明朝搿日,已经是第14个母语日了。搿个纪念日是1999年联合国教科文组织(UNESCO)第30届大会决定设立个,目的在于表达国际社会支持语言多样性个基本态度,并且希望通过辣辣每年个搿一天开展活动来提醒全世界个人一道关心各自个母语,以及附着于语言高头个文化传统。

       目前,世界浪拢总【总共】有得六千到七千种人类语言,其中一半以上呒没书面形式,大多数语言个处境相当艰难。对于地球高头个交关民族来讲,母语,搿一笔宝贵个文化财富,正辣辣面临迅速失传个危险。联合国教科文组织从2000年开始,辣辣每年个2月21号举办丰富多样个专题活动,邀请世界各地个濒危语言使用者代表共同探讨保存、延续各自母语生命个经验搭仔教训。

       每一年个活动侪有得勿同个主题。2013年“国际母语日”个主题是:用于母语教育个书籍。关于迭个主题,联合国教科文组织总干事伊琳娜·博科娃女士认为,“语言个活力,既取决于伊阿是辣辣口头浪讲,也取决于阿是有得大量使用搿种语言个教材搭仔读物。我伲必须竭尽全力,确保尽可能公平个分发教材搭仔书籍,使得每一个人,特别是儿童,侪可以用自家选择个语言,包括自家个母语来阅读”。具体讲到阿拉上海闲话个情况,大家侪能够看到,近一抢,勿管是辣辣平面媒体,还是辣辣网络空间,上海闲话个出镜率侪比以往有所增加。特别值得注意个是,方言教材个编写、出版、使用,目前有得一轮复苏个趋势。方言是我伲每一个人内心深处最最亲近个闲话。我伲现在之所以要辣辣推广普通话个同时提倡科学传承方言文化,是因为和谐个社会离勿开繁荣个文化,包括薪火相传个乡土文化,也离勿开新老上海人之间个互相理解搭仔包容,葛咾大家也要相互了解勿同个语言文化背景。

       方言是“母语”个一种具体表现形式。我伲纪念“国际母语日”,尤其需要理解其精神内涵,搭发生辣身边个点滴小事联系起来。譬如讲,现在勿少个爷爷唔奶【nna】、外公外婆侪欢喜搭小囡“开国语”(讲普通话)。搿种做法个出发点是好个,是希望小囡能够尽早个学会我伲个国家通用语言。但是如果变成功搭小囡只“开国语”,勿讲方言,就未免有一眼极端了。搿能介甚至于可能影响小囡接触、了解自家个母语,对伊拉个将来造成勿可逆转个影响。搿眼细节问题,侪值得引起我伲个注意搭仔反思。

       博科娃女士还讲,“对于人类而言,多语言个使用,既是一种力量,也是一个机遇。保护语言有助于对人类知识个保护搭仔传承,还能够帮助我伲每一个人发出自家个声音,并且获得尊重,所以搿个是一种推动社会包容个力量。”希望大家能够告诉身边个朋友,明朝是一个具有特别意义个日脚,母语个命运也需要我伲365天来关心。   

       摘自 新民晚报20130220 B4版